పూరీ జగన్నాథ్ 'స్లమ్ డాగ్'లో విజయ్ సేతుపతి ప్రాత ఇదేనా?

డైనమిక్ డైరెక్టర్ పూరి జగన్నాథ్, విలక్షణ నటుడు విజయ్ సేతుపతి కలయికలో రూపొందుతున్న భారీ పాన్-ఇండియా చిత్రం ‘స్లమ్ డాగ్: 33 టెంపుల్ రోడ్’. ఎంతో ఆసక్తిగా ఎదురుచూస్తున్న ఈ సినిమా టీజర్‌ను సోమవారం సాయంత్రం 6 గంటలకు చిత్రబృందం విడుదల చేసింది. ఇందులో విజయ్ సేతుపతి మురికివాడలో నివసించే అంధుడైన బిచ్చగాడి పాత్రలో కనిపించి అందరినీ విస్మయానికి గురిచేశారు.

టీజర్ ప్రారంభంలో, యాచకుల కష్టాలను ఎవరూ పట్టించుకోరని చెబుతూ, వారిని దోచుకునే వారికి హెచ్చరికలు జారీ చేస్తూ విజయ్ సేతుపతి చెప్పిన మోనోలాగ్ ఎంతగానో ఆకట్టుకుంది. ఆ తర్వాత పూరి జగన్నాథ్ మార్క్ యాక్షన్ సన్నివేశాలు, భావోద్వేగపూరితమైన సన్నివేశాలతో టీజర్‌ను ఆసక్తికరంగా మలిచారు. విజయ్ సేతుపతి పాత్రకు నిజంగానే కళ్లు కనిపించవా లేదా ఆ పాత్ర వెనుక ఏదైనా రహస్యం ఉందా? అనే ఉత్కంఠను రేకెత్తించడంలో టీజర్ విజయవంతమైంది.

ఈ చిత్రంలో విజయ్ సేతుపతి తన పాత్రకు తెలుగు, తమిళం మరియు హిందీ భాషల్లో స్వయంగా డబ్బింగ్ చెప్పుకోవడం విశేషం. పవర్‌ఫుల్ పోలీస్ ఆఫీసర్ పాత్రలో టబు, కథానాయికగా సంయుక్త మీనన్ నటిస్తుండగా, దునియా విజయ్ ప్రతినాయకుడిగా కనిపిస్తున్నారు. బ్రహ్మాజీ, వీటీవీ గణేష్ తదితరులు ఇతర కీలక పాత్రలు పోషిస్తున్నారు.

పూరి కనెక్ట్స్ మరియు జేబీ మోషన్ పిక్చర్స్ సంయుక్తంగా నిర్మిస్తున్న ఈ చిత్రానికి జాతీయ అవార్డు గ్రహీత హర్షవర్ధన్ రామేశ్వర్ సంగీతం అందిస్తుండగా, సామ్ కె. నాయుడు సినిమాటోగ్రఫీ బాధ్యతలు నిర్వహిస్తున్నారు. ప్రస్తుతం శరవేగంగా నిర్మాణానంతర పనులు జరుపుకుంటున్న ఈ చిత్రాన్ని 2026లో బహుళ భాషల్లో విడుదల చేసేందుకు సన్నాహాలు చేస్తున్నారు.